شكراً 2013

قربت السنة تخلص وبلشو هالعالم تكتب عصفحاتها أمانيها للسنة لجديدة...بلشت العالم تشاركنا أفكارها عن كيف بدا تضعف..كيف بدا تتقدم بشغلها..كيف بدا تسافر بلاد العالم وكيف وكيف وكيف..
قربت السنة الجديدة وأنا بس عم فكر كيف مضيت هالسنة..بحلوها وأهم شي بأكل خراها..نعم متل ما قريتو، شو مستإلين بالخرا لإكلتو هالسنة؟!
الناس عم تقلي روقي يا بنت والوقت بحل كل شي..روقي يا مريم ومتل ما أكلوووكي هالهوا حياكلو هن وأكتر كمان..
يمكن الناس حكيها مزبوط..وبالآخر لسا عندي إيمان من جوا إنو كما تدين تدان يا عزيزي..
بيكفي فش خلق وخلينا نحكي بالمهم، ألا وهو: لولا ما أكلت الخرا ما كنت حسيت بطعمة الحلو. يعني، لولا ما مشيت هالناس من حياتي..هالناس لمعدنها طلع كل شي إلا من ذهب، ما كنت وعيت عالحواليي من عالم فعلا هي مطرحها بالقلب...ومع هيك مش هيدا المهم.
المهم يا حلوين إنو أنا متأكدة من شي واحد بس. مش إنو الله رح يبعتلي ناس أحسن وهالكلام، لأ! أنا متأكدة إنو بغياب وبرحيل عالم من حياتي هالسنة حيخليني إفضى لحالي السنة الجاية. حيخليني إقعد مع حالي وشوف هالمريم كيفا. هالمريم لتكونت بآخر كم سنة راضية عن تكوينها أو لأ...بدي قلها لهالمريم إنو لجاية إن شاء الله دايما أحسن من لراح...
وبالنهاية، بتمنا السنة الجاية تكون حلوة عالجميع (بصراحة مش كلكن ليه الكذب بس إنو)..
وبحب ذكركن، خلونا نبلش هالسنة بنية صافية وابتسامة عريضة...وبلا منطعمي العالم...هوا! (شووو...قلنا نية صافية)!
وأخيرا، سامحوني على ما بدر وما لم يبدر مني...
ويلا، هيدي أمنيتي لإلكن: تصبحون على أيام وسنوات مليئة بما هو خير لكم...